Режисерката и поранешна амбасадорка на Македонија во Јапонија, Андријана Цветковиќ, денеска на прес-конференција во Токио ги соопшти филмските наслови што ја сочинуваат програмата Women’s Empowerment (Женско охрабрување), во рамките на 37. Филмскиот фестивал од А категорија. Ова е прв пат, селектор кој не е Јапонец да ја добие честа и да ја има оваа улога.
-Пораснав во свет во кој сонот на една девојка да стане режисер беше далечен, затоа сум горда што сум дел од оваа трансформација. Со оваа програма, помагаме за инклузивен свет и родова еднаквост во филмската индустрија – рече Цветковиќ.
На следниот ЛИНК е целата селекција што ја направи нашата режисерка за првата година на оваа востановена програма.
– Како прв странски програмер во историјата на овој фестивал од 1985 година, а уште повеќе како жена што ја води оваа витална иницијатива, овој момент е неверојатно посебен за мене. Во оваа улога, ќе курирам филмови кои го слават извонредниот талент и визија на жените филмаџии и се залагаат за поинклузивна и избалансирана индустрија. Импулсот на кој сме сведоци денес е јасен знак дека женските гласови влегуваат во центарот на вниманието, подготвени да го преобликуваат киното со нивните уникатни, моќни приказни. Да се биде дел од оваа историска промена не е само признание – тоа е за застапување за иднина каде што повеќе жени ќе можат да снимаат филмови, да ги раскажуваат своите приказни и да се погрижат секој глас да се слуша и слави. Патувањето кон еднаквост не е завршено, но ова е значаен чекор напред – вели Цветковиќ.
